Marketinqlə tanışlığım Türkiyədə, universitet illərində başladı. Alanyada turizm menecmenti oxuyurdum, amma vaxtımın çoxu reklam kabinetlərində, müştəri səhifələrində və kampaniya hesabatlarının arasında keçirdi. Bir müddət sonra gördüm ki, bu işləri etmək qədər başqasına izah etməyi də sevirəm.

Beləcə Türkiyədə 5 il rəqəmsal marketinq dərsi dedim. Bu illərdə 500-dən çox tələbəm oldu. Aralarında sıfırdan başlayan da var idi, öz biznesini böyütmək istəyən sahibkar da. Dərslərdə həmişə bir qaydam olub: nəzəriyyə qısa, praktika çox. Tələbə dərsdən çıxanda əlində işləyən bir kampaniya, bir kontent planı və ya ilk müştərisi üçün hazır təklif olmalıdır.

Dərs deməklə yanaşı, sahədə də işlədim: Türkiyədə marketinq agentliklərində və daşınmaz əmlak sektorunda, Azərbaycanda isə təhsil mərkəzlərində və müxtəlif brendlərlə. Reklam ROI-ni 35–40% artırdığım, satışları ilk altı ayda 20% qaldırdığım layihələr oldu. Bu rəqəmləri ona görə yazıram ki, dərsdə danışdığım hər şeyi əvvəl öz işimdə yoxlamışam.

Son illərdə diqqətimi süni intellektə yönəltdim. Bu gün AI ilə reklam çarxları, vizuallar və musiqi klipləri hazırlayıram. Tünzalə Ağayeva, Brilliant Dadaşova, Mədəniyyət Nazirliyi, ARTMARK, Kinomax kimi adlarla birgə işləmişik.

Hazırda Zirvə Labs-in təsisçilərindən biriyəm. Burada SMM, Generative AI və AI avtomatlaşdırma dərsləri deyirəm. Tələbələrimin bir hissəsi artıq bu bacarıqlarla pul qazanır: brendlər üçün reklam çarxları çəkir, öz YouTube kanalını aparır, bəziləri öz AI şirkətini qurub. Mənim üçün ən böyük nəticə budur.